Լոգարանը յուրաքանչյուր տան կարևոր ատրիբուտներից է։ Լոգասենյակներում թուջե լոգարաններին փոխարինելու են եկել նոր, գեղեցիկ դիզայնով ակրիլային տարբերակները։
Խորհուրդներ լոգարանի մակերեսը պահպանելու վերաբերյալ
Հայտնի է, որ ակրիլը հեշտությամբ քերծվում է և վնասվում լվացող միջոցներից: Ակրիլային լոգարանը մաքուր պահելու ամենակարեւոր պայմանը կանոնավոր խնամքն է (ցանկալի է՝ ամեն օր):
Որպեսզի ակրիլային լոգարանը երկար պահպանի իր սկզբնական տեսքը, քսեք խեժային հիմքով լաք։ Դա լոգարանին կհաղորդի սահուն մակերես ու կեղտապաշտպան հատկություն:
Ամեն օր սրբեք լոգարանը փափուկ կտորով՝ օգտագործելով ոչ ուժեղ լվացող միջոցներ:
Ակրիլային լոգարանները մաքրելու համար արգելվում է օգտագործել հետևյալ միջոցները.
հղկող նյութեր պարունակող լվացքի փոշիները,
քլորը,
ացետոնը և այլ լուծիչները, քանի որ դրանք վնասում և քայքայում են ակրիլը:
Ակրիլային լոգարանի մաքրման մեթոդները
Ակրիլային լոգարանի մաքրման համար կարող եք օգտագործել ավանդական միջոցներ, ինչպիսիք են քացախը, կիտրոնաթթուն, սոդան, ինչպես նաև՝ կիրառել տնտեսական խանութներից ձեռք բերված տարբեր նյութեր: Քերծվածքներից խուսափելու համար խորհուրդ է տրվում լոգարանը լվանալ փափուկ սպունգով:
Ակրիլային լոգարանը կրաքարից մաքրելու համար կարող եք օգտագործել սովորական սեղանի քացախը (9%)։ 1 լ քացախը պետք է լուծել տաք ջրի մեջ և այդպես թողնել 12 ժամ։ Այնուհետև քամել հեղուկը և սրբել լոգարանը: Քացախի փոխարեն կարող եք օգտագործել նաև կիտրոնաթթու։
Սոդայի օգնությամբ հնարավոր է հեռացնել և՛ կրաքարը, և՛ փայլեցնել լոգարանը։ Այդ նպատակով մեկ տուփ սոդան լուծեք տաք ջրի մեջ և թողեք 1 ժամ։ Կրաքարը հեռացնելու համար սոդան խառնեք ջրի հետ, թրմեք 30 րոպե և անցեք լվանալու գործընթացին։
Դեղին բծերը կարելի է լվանալ ջրածնի պերօքսիդով և քացախով (3:1 հարաբերակցությամբ): Հեղուկը պետք է ցողել մակերեսի վրա և 15 րոպե հետո լվանալ։
Մանանեխի փոշին և սոդան նույնպես հիանալի միջոց են դեղնության դեմ։
Ակրիլային լոգարանից ժանգը կարելի է հեռացնել կիտրոնի հյութով (քսել և 30 րոպե հետո լվանալ), նաև՝ ամոնիակով և ջրածնի պերօքսիդով՝ հավասար համամասնությամբ։
